27 август Президенти Ҷумҳурии Тоҷикистон Эмомалӣ Раҳмон маҷлиси навбатии Ҳукумати Ҷумҳурии Тоҷикистонро доир намуд.
Дар маҷлис баъди баррасии масъалаи кадрҳо силсилаи лоиҳаи қонунҳо "Дар бораи маълумоти ибтидоии касбӣ", "Дар бораи ворид сохтани тағйироту иловаҳо ба Қонуни Ҷумҳурии Тоҷикистон "Дар бораи дастовардҳои селексионии парвариши зироат", "Дар бораи ворид намудани тағйирот ба Қонуни Ҷумҳурии Тоҷикистон "Дар бораи таъминоти нафақаи шаҳрвандони Ҷумҳурии Тоҷикистон"-ро тасдиқ намуданд.
Маҷлиси Ҳукумат роҷеъ ба масъалаҳои дорои хусусияти байналхалқӣ қарорҳо қабул кард. Аз ҷумла Созишномаи байниҳукуматии Тоҷикистону Қазоқистон дар бораи танзими шартҳои рафту омади шаҳрвандони Ҷумҳурии Тоҷикистон ва Ҷумҳурии Қазоқистон ба кишварҳои дигар тасдиқ карда шуд.
Ҳамзамон дар маҷлиси Ҳукумат дигар масъалаҳои соҳаҳои гуногуни мамлакат мавриди муҳокима қарор гирифтанд.