Президенти Ҷумҳурии Тоҷикистон

Ба истифода додани пойгоҳи обкашии «Деҳмой-1» дар ноҳияи Ҷаббор Расулов

02.07.2020 11:02, ноҳияи Бобоҷон Ғафуров

2 июл Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба вилояти Суғд, ҳамчунин ба ноҳияи Ҷаббор Расулов ташриф оварданд.

Нахуст Сарвари давлат дар Ҷамоати деҳоти Деҳмойи ноҳия пойгоҳи обкашии «Деҳмой-1»-ро, ки бо дастгирии Ҳукумати Ҷумҳурии Тоҷикистон пурра таъмиру таҷдид гардидааст, мавриди баҳрабардорӣ қарор доданд.

Пойгоҳи мазкур солҳои 60-уми қарни гузашта дар маҷрои дарёи Сир бунёд шудааст ва 6 агрегати он ниёз ба таъмири пурра пайдо карда, ду агрегати дигар умуман фаъолият намекард. Аз ин сабаб дар самти обёрии заминҳои кишоварзӣ дар ҷамоатҳои деҳоти Деҳмой, Гулхона, Сомониён, Ғулакандоз, инчунин қисман заминҳои ҳудуди деҳоти Ҳаёти нав мушкил ба вуҷуд меомад. Ҳамакнун ин мушкил аз байн рафт ва минбаъд тавассути пойгоҳи обкашии «Деҳмой-1» 7885 гектар замини кишоварзӣ дар ноҳияи Ҷаббор Расулов бо оби полезӣ таъмин мешавад. Зеро 5 агрегати мавҷудаи пойгоҳ аз таъмири пурра бароварда шуда, дар ҷойи агрегатҳои фарсуда ду муҳаррик ва ду дастгоҳи обкашии наву замонавӣ насб гардид.

Муҳаррикҳои нав имкони то 20 фоиз сарфа намудани қувваи барқро доро буда, ҳар яки он дар як сония то 1300 литр оби полезӣ интиқол медиҳад. Дар маҷмӯъ иқтидори пойгоҳ дар як сония ба интиқоли 9,2 метри мукааб оби полезӣ баробар мебошад.

Ба Президенти мамлакат иттилоъ дода шуд, ки тавассути ин пойгоҳ оби полезӣ то се баландӣ, яъне аз пойгоҳи «Деҳмой-1» ба канали магистралии Деҳмой, сипас ба каналҳои Хоҷабақирғон 2 ва 3 таъмин карда мешавад.

Дар заминаи таъмиру барқарорсозии пойгоҳи обкашии «Деҳмой-1», аз ҷумла насби ду агрегати нав, таъминоти оби полезӣ дар мавзеи Рухак беҳтар мешавад. Дар ин ҷо 400 гектар заминҳои корами ноҳияи Ҷаббор Расулов ва 210 гектар заминҳои ноҳияи Бобоҷон Ғафуров, ки қаблан аз сабаби норасоии об қисман кишт мешуданд, шодоб гардиданд.

Имрӯз дар пойгоҳи обкашии «Деҳмой-1» 13 нафар мутахассиси соҳа фаъолият дошта, кафолати тӯлонӣ коршоям будани агрегатҳои он таъмин аст.

Дар ҳамин ҷо ба Сарвари давлат Лоиҳаи миллии идоракунии захираҳои об дар Тоҷикистон, марҳилаи 2 ва Лоиҳаи барқарорсозии системаи обёрӣ ва идоракунии он дар ҳавзаи дарёи Зарафшон муаррифӣ карда шуд. Лоиҳаи миллии идоракунии захираҳои об дар Тоҷикистон, марҳилаи 2, ки мақсади татбиқаш беҳтар намудани сатҳи зиндагии аҳолии деҳот дар қисми Тоҷикистонии ҳавзаи Сирдарё тавассути идоракунии ҳамгироёнаи захираҳои об мебошад, 100 фоиз иҷро гардидааст. Дар ин доира пойгоҳҳои обкашӣ дар ноҳияи Ҷаббор Расулов, аз ҷумла таъмиру таҷдиди пойгоҳи обкашии «Деҳмой-1», ҳамчунин каналу қубурҳои асосии обгузари системаи иригатсионии Оқсу дар ноҳияи Спитамен ва канали Хоҷабақирғони ноҳияи Бобоҷон Ғафуров таъмири пурра карда шуд.

Таъмиру таҷдид ва муҷаҳҳаз намудани бинои Идораи давлатии беҳдошти замин ва оберии ҳавзаи Зарафшон ва Ассотсиатсияи истифодабарандагони об дар шаҳри Панҷакент, барқарорсозии 11 пойгоҳи обкашӣ, 20 чоҳи амудӣ, 7 адад сад, инчунин селроҳаҳо, таъмиру таҷдиди 1000 километр ҷуйборҳои дохилихоҷагӣ дар шаҳри Панҷакент ва ноҳияҳои Айнӣ, Шаҳристон ва Кӯҳистони Мастчоҳ аз корҳое мебошанд, ки дар доираи Лоиҳаи барқарорсозии системаи обёрӣ ва идоракунии он дар ҳавзаи дарёи Зарафшон иҷро гардидаанд.

Татбиқи лоиҳаи мазкур 80 фоизро ташкил медиҳад.

Ба хотири саривақт тоза намудани заҳбуру заҳкашҳо, шабакаҳои обгузар ва таъмини пайвастаи оби полезӣ, инчунин беҳтар кардани ҳолати мелиоративии заминҳои кишоварзӣ аз ҷониби Пешвои миллат муҳтарам Эмомалӣ Раҳмон ба Идораи давлатии беҳдошти замин ва обёрии ноҳияи Ҷаббор Расулов як адад техникаи махсуси пуриқтидору замонавӣ туҳфа карда шуд.

Сарвари давлат ҷиҳати истифодаи дурусти дастгоҳу таҷҳизоти мавҷуда, саривақт ва ҳарчи бештар обёрӣ намудани заминҳои кишоварзӣ тавассути пойгоҳи обкашии «Деҳмой-1» масъулонро муваззаф намуданд.

facebook
twitter
Хабарҳо
Ҳамаи хабарҳо
 
Идома
 
Идома
Идома
Нома ба президент
Мувофиқи талаботи моддаи 21 Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» муроҷиатҳое, ки дар онҳо насаб, ном, номи падари шахси воқеӣ, маълумот дар бораи суроғаи маҳалли истиқомат ё номи пурраи шахси ҳуқуқӣ ва суроғаи маҳалли ҷойгиршавии он зикр нашудаанд ё хато нишон дода шудаанд, инчунин бе имзо (имзои электронии рақамӣ) пешниҳод шудаанд, муроҷиатҳои беном дониста шуда, мавриди баррасӣ қарор намегиранд, агар онҳо дорои маълумот оид ба тайёрӣ барои содир кардани ҷиноят ё ҷинояти содиршуда набошанд.
Image CAPTCHA
Харита
© Хадамоти матбуоти Президенти Тоҷикистон
Тел/Факс.: (+992 37)2212520