7 апрел Президенти Ҷумҳурии Тоҷикистон Эмомалӣ Раҳмон ба унвони Хони Монако Алберти дуюм барқияи ҳамдардӣ фиристод, ки дар он гуфта мешавад:

"Ҳамдардии самимонаи маро вобаста ба вафоти Хон Ренеи III  қабул фармоед. Вай бо фаъолияти хастагинопазири худ ба манфиати Ватан ва халқаш сазовори эҳтироми бепоёни мардуми тамоми ҷаҳон гардида буд. Муваффақиятҳои  Монако дар бобати пешрафти иқтисодиёт, ободии мамлакат ва баланд гардидани обрӯю эътибори он дар арсаи ҷаҳонӣ бо номи ӯ вобаста мебошад.

Наслҳои имрӯзаю оянда номи неки Хон Ренеи III-ро ҳеҷ гоҳ фаромӯш нахоҳанд кард".