19 сентябр Президенти Ҷумҳурии Тоҷикистон Эмомалӣ Раҳмон бо иштироки Сарвазири ҷумҳурӣ Оқил Оқилов, аъзои Ҳукумати ҷумҳурӣ, Роҳбари Дастгоҳи иҷроияи Сарвари давлат Маҳмадназар Солеҳов, мушовирони давлатии Сарвари давлат ва дигар шахсони масъул машварати корӣ анҷом дод.

Дар машварат як қатор масоили ҷории роҷеъ ба татбиқи сиёсати дохиливу хориҷии кишвар мавриди баррасӣ қарор гирифт.

Президенти Ҷумҳурии Тоҷикистон Эмомалӣ Раҳмон диққати иштирокчиёни машваратро ба масъалаҳои вазъи корҳои кишоварзӣ, саривақт додани маошу кӯмакпӯлиҳо ба аҳолӣ, омодагӣ ба чорабиниҳои муҳимми байналмилалӣ, аз қабили ҷаласаҳои сарони ҳукуматҳои Иттиҳоди иқтисодии Аврупову Осиё ва Созмони ҳамкории Осиёи Марказӣ, ки ба наздикӣ дар шаҳри Душанбе ҷараён мегиранд, равона кард.

Дар машварат ҳамчунин масоили оғози расмии корҳои сохтмонӣ дар Нерӯгоҳи барқии обии Роғун, омодагӣ ба рӯзҳои фарҳанги Тоҷикистон дар Федератсияи Россия ва Рӯзи Тоҷикистон дар ЮНЕСКО, омодагӣ ба сафарҳои дохилиҷумҳуриявии Сарвари давлат, ки дар ояндаи наздик ба нақша гирифта шудаанд, рафти корҳои сохтмонӣ дар нерӯгоҳҳои барқии обии Сангтӯда - 1 ва Сангтӯда - 2, нақби Анзоб ва омодагӣ ба оғози кор дар нақби ағбаи Шаҳристон баррасӣ шуданд.