Нимаи дуюми рўз мулоқотҳои Президенти Ҷумҳурии Тоҷикистон Эмомалӣ Раҳмон бо меҳмонони воломақом, ки барои иштирок дар ҳамоиши сарони ҳукуматҳои кишварҳои аъзои Созмони Ҳамкории Шанхай ба шаҳри Душанбе ташриф овардаанд, идома ёфт.

Нахуст Сарвари давлат Эмомалӣ Раҳмон Сарвазири Ҷумҳурии Исломии Покистон Юсуф Ризо Гелониро ба ҳузур пазируфт.

Дар мулоқот масоили ҳамкории дуҷониба ва бисёрҷонибаи ду кишвар баррасӣ шуд.

«Мо шодем, ки муносибатҳои Тоҷикистону Покистон имрўз дар авҷи густариши худ қарор доранд», - изҳор дошт дар оғози сўҳбат Президенти Ҷумҳурии Тоҷикистон Эмомалӣ Раҳмон.

Юсуф Ризо Гелонӣ низ аз густариш бесобиқа пайдо намудани равобиту ҳамкории судманди Тоҷикистону Покистон изҳори хушнудӣ намуд.

Чунонки таъкид гардид, ба фаъолият шурўъ намудани шоҳпули мошингарди Панҷи поён, кушода шудани хатсайри мустақими ҳавоӣ миёни шаҳрҳои Душанбею Исломобод ва пайдо шудани дигар имконоти нави ҳамкорӣ барои густариши робитаҳои мутақобилан судманд заминаи мусоид ба миён овардаанд.

Аз тасмимоти нави ҷониби Покистон доир ба бунёди корхонаҳои муштараки саноатӣ дар Тоҷикистон, аз ҷумла як корхонаи бузурги сементбарорӣ ва омодагии устувори ин кишвар ба иштирок дар татбиқи бисёр лоиҳаҳои соҳаҳои энергетика, саноат ва нақлиёту коммуникатсия изҳори қаноатмандӣ карда шуд.

Ҳавасмандии ҳарду ҷониб ба татбиқи лоиҳаи КАСА – 1000 оид ба кашидани хатти 500 киловолтаи интиқоли нерўи барқ аз Тоҷикистон ба Покистон аз тариқи қаламрави Афғонистон таъкид гардид.

Бунёди корхонаҳои муштарак дар соҳаҳои саноати сабук ва хўрокворӣ, истихроҷи маъданҳои кўҳӣ, коркарди маҳсулоти кишоварзӣ, дорусозӣ ва робитаҳои илмию техникӣ дорои суди муштарак маънидод гардид.

Таваҷҷўҳи зиёд ҳамчунин ба густариши ҳамкориҳои минтақавӣ, аз ҷумла дар чаҳорчўби Созмони ҳамкории Шанхай ва Чоргонаи Душанбе миёни Тоҷикистон, Покистон ва Афғонистону Русия зоҳир карда шуд.