Президенти Ҷумҳурии Тоҷикистон Эмомалӣ Раҳмон ҳамчунин Президенти ҷамъиятҳои яҳудиёни Иттиҳоди Давлатҳои Мустақил ва Президенти Конгресси умумиҷаҳонии яҳудиёни бухороӣ Лев Леваевро ба ҳузур пазируфт.
Дар мулоқот масоили ҷорӣ ва рушди муносибатҳои Тоҷикистон бо ҷамъиятҳои яҳудиён, аз ҷумла яҳудиёни бухороӣ, ки қисмати зиёди онҳо дар кишвари мо кору зиндагӣ карданд, баррасӣ шуд.
Дар сӯҳбат бештар ба масоили ба роҳ мондани ҳамкории ширкатҳои ин сарватманди машҳури яҳудӣ дар мавриди истихроҷ ва коркарди нафт, тиллою нуқра ва дигар маъданҳои кӯҳии Тоҷикистон таваҷҷӯҳ зоҳир карда шуд.
Лев Леваев изҳор дошт, ки ӯ ва дигар соҳибкорону тоҷирони сарватманди яҳудӣ баҳри ташкил ва густариши ҳамкорӣ бо Тоҷикистон ҳавасмандии зиёд доранд.
Зимни сӯҳбати пурмӯҳтаво ҳарду ҷониб баҳри таҳкиму густариши ҳамкории мутақобилан судманд омодагии худро таъкид намуданд.