Президенти Ҷумҳурии Тоҷикистон Эмомалӣ Раҳмон кадрҳои ба вазифаҳои сатҳи роҳбарии Вазорати кишоварзӣ ва сохторҳои зертобеи он, роҳбарияти дигар идораҳои ҷумҳуриявӣ, муовинони раиси раёсати Бонки давлатии амонатгузорӣ «Амонатбонк», роҳбарони муассисаҳои Ҷамъияти саҳҳомии кушодаи «Нерӯгоҳи барқии обии Роғун» ва судяҳо пешниҳодшударо барои сӯҳбат ба ҳузур пазируфт.
Сарвари давлат Эмомалӣ Раҳмон аз вазифаҳои дар назди мақомоти сатҳу зинаҳои гуногуни ҳокимияти давлатӣ қарордошта ёдовар шуда, онҳоро ба кори софдилонаю содиқона ба нафъи давлату миллати худ ҳидоят намуд.
Назорати иҷрои нишондодҳои муроҷиатномаи Президенти Ҷумҳурии Тоҷикистон оид ба таъмини амнияти озуқаворӣ тариқи истифодаи пурсамар аз тамоми заминҳои корам ва афзун намудани истеҳсоли маҳсулоти худӣ ва ҳамчунин татбиқи барномаю нақшаҳои гуногуни давлатӣ дар ин соҳа аз ҷумлаи вазифаҳои аввалиндараҷаи масъулини Вазорати кишоварзӣ дар шароити имрӯза маънидод гашт. Супоришҳои мушаххас ҳамчунин ба кадрҳои ба вазифаҳои сатҳи роҳбарии Агентии заминсозӣ, геодезӣ ва харитасозӣ ва Агентии захираҳои моддии давлатӣ пешниҳодгашта дода шуд.
Сарвари давлат Эмомалӣ Раҳмон ҳамчунин баҳри дастгирии молиявии кишоварзон тавассути афзун намудани қарзҳои хурд ба масъулини Бонки давлатии амонатгузорӣ «Амонатбонк» дастуру ҳидоятҳо дод.
Кадрҳои ба мақоми роҳбарони муассисаҳои Ҷамъияти саҳҳомии кушодаи «Нерӯгоҳи барқии обии Роғун» пешниҳодгашта худ изҳор доштанд, ки вазифаю масъулияти бар дӯш гирифтаашонро хуб медонанд ва баҳри иҷрои онҳо камар мустаҳкам бастаанд.
Ҳифзи ҳуқуқи шаҳрвандон, баланд бардоштани дониши ҳуқуқии онҳо ва риояи адолати судӣ аз зумраи вазифаҳои асосии судяҳо арзёбӣ гардид.
Ҳамаи кадрҳои ба вазифаҳои пурмасъулият пешниҳодгашта қавл доданд, ки баҳри татбиқи амалии сиёсати мардумсолории Президенти Ҷумҳурии Тоҷикистон Эмомалӣ Раҳмон тамоми донишу қобилияти худро равона карда, дар рушду нумӯи кишвар саҳмгузор мешаванд.