Президенти Ҷумҳурии Тоҷикистон Эмомалӣ Раҳмон Директори муассисаи минтақавии Созмони ҷаҳонии тандурустӣ Марк Данзонро ба ҳузур пазируфт.
Дар мулоқот масоили ҳамкории Тоҷикистон бо Созмони ҷаҳонии тандурустӣ баррасӣ шуд.
Сарвари давлат Эмомалӣ Раҳмон аз ҳамкории Тоҷикистон бо ин созмон изҳори қаноатмандӣ карда, ба роҳбарияти он барои таҳкими робитаҳои судбахш ва ҳамчунин баҳри дар ҳолати бӯҳронии имрӯза таъҷилан ба кӯмаки кишвари мо рӯ овардан арзи сипосу миннатдорӣ кард.
Марк Данзон дар навбати худ изҳор дошт, ки Созмони ҷаҳонии тандурустӣ ва шахсан худи ӯ ба Тоҷикистон дар раванди ислоҳоти соҳаи тандурустӣ, ҷорӣ намудани низоми муосири ҷамъоварӣ ва мубодилаи иттилоот кӯмаки беғаразона мерасонад. Ӯ ҳамчунин таъкид дошт, ки ҷиҳати расондани кӯмакҳои фаврӣ баҳри бартараф намудани мушкилоти имрӯзаи муассисаҳои тандурустии Тоҷикистон, аз ҷумла барои кори доимии беморхонаҳо ва таъминоти онҳо бо нерӯи барқ, доруворӣ ва дигар ашёи зарурӣ ҷомеаи ҷаҳониро ташвиқ хоҳад намуд.
Ҷонибҳо оид ба тафсилоти ҳамкории муассисаҳои соҳаи тандурустии Тоҷикистон бо Созмони ҷаҳонии тандурустӣ, ҷараёни ислоҳоти соҳа дар кишвар, тадбирҳои муштараки зидди паҳншавии бемориҳои сироятӣ, омода кардани кадрҳои баландихтисос ва беҳтарсозии заминаи моддию техникии ин соҳа дар ҷумҳурии мо гуфтугӯи судманд анҷом доданд.
Зимни сӯҳбати пурмӯҳтаво ҷонибҳо омодагии худро баҳри идомаи ҳамкории судбахш таъкид намуданд.