Нимаи дуюми рўз Президенти Ҷумҳурии Тоҷикистон Эмомалӣ Раҳмон ҳайати Гурўҳи махсуси иттилоотӣ доир ба масоили оби Комиссияи Миллии Ассамблеяи Фаронса оид ба корҳои хориҷиро бо роҳбарии Леонел Люка ба ҳузур пазируфт.

Дар мулоқот мушкилоти вобаста ба об дар минтақа ва ҷаҳон ва роҳҳои истифодаи босамар аз захираҳои обию энергетикии Тоҷикистон ва Осиёи Марказӣ баррасӣ шуд.

Тавре Сарвари давлат Эмомалӣ Раҳмон изҳор дошт, «Тоҷикистон ҳеҷ гоҳ ягон лоиҳаеро бар зиёни ҳамсоягони худ амалӣ нахоҳад кард ва мо ҳамеша омодаи муколама ва ҳамкорӣ мебошем».

Бо ёдоварӣ аз ташаббусҳои обии Тоҷикистон, ки имрўз дар ҷаҳон ба нафъи мардуми кулли сайёра босамар татбиқ мегарданд, изҳори боварӣ карда шуд, ки тавассути ҳамкорӣ ва ҳусни ҳамсоягӣ баҳсу мунозираҳои обии минтақаи Осиёи Марказӣ ҳаллу фаслу худро меёбанд.

Дар мулоқот ҳамчунин доир ба паҳлўҳои дигари авзои кунунии минтақа ва ҷаҳон ва мавзўъҳои гуногуни мавриди таваҷҷуҳ гуфтугўи судманд сурат гирифт.